Молитва Святому Священно
Мученику Антипе, епископу Пергама Асийского
О, преславный священномучениче Антипо и скорый помощнице
христианам в болезнях! Верую от всея души и помышления, яко дадеся тебе
от Господа дар болящая исцеляти, недугующия врачевати и разслабленныя укрепляти.
Сего ради к тебе, яко благодатному врачу болезней, аз немощный прибегаю
и, твой досточтимый образ со благоговением лобызая, молюся: твоим предстательством
у Царя Небеснаго испроси мне болящему исцеление от удручающия мя зубныя
болезни, аще бо и недостоин есмь тебе благостнейшаго отца и приснаго заступника
моего, но ты, быв подражатель человеколюбия Божия, сотвори мя достойна
твоего заступления чрез мое обращение от злых дел к благому житию, уврачуй
обильно дарованною тебе благодатию язвы и струпы души и тела моего, даруй
ми здравие и спасение и во всем благое поспешение, да тако тихое и безмолвное
житие пожив во всяком благочестии и чистоте, сподоблюся со всеми святыми
славити Всесвятое имя Отца и Сына и Святаго Духа. Аминь.
ТРОПАРЬ, ГЛАС 4
Идольския лести упразднил еси, Антипо, и диавольскую
поправ силу, пред богоборцы дерзновенно Христа исповедал еси. Темже со
ангельскими чины в вышних водворяяся, Владыце всех славословие принося,
и о нас молебное благодарение предлагаеши, благодать цельбы даруя. Сего
ради тя чтим, священномучениче Антипо, моли Христа Бога, да спасет души
наша.
КОНДАК, ГЛАС 4
Апостолов сопрестольник и святителей украшение был
еси, блаженне, мученически прославився, возсиял еси якоже солнце, всех
просвещая, Антипо священне, разрушил еси безбожия нощь глубокую. Сего ради
тя почитаем, яко Божественнаго суща священномученика и целеб подателя.
При зубной боли возносят молитвы также и :
Молитва Святому
преподобному Геннадию Костромскому и Любимоградскому
Святителю Ионе, Митрополиту
Московскому всея Руси чудотворцу |
